ڀڳت، آتم: آتم ڀڳت مٺيءَ جي مشهور راڳي موهن ڀڳت سان گڏ ڳائيندڙ ساٿي سروپ ڀڳت جو پٽ آهي. سروپ کي پٽ نه هو ۽ هن آتم کي پٽ ڪري پاليو. آتم ڀڳت 1975ع ۾ مٺيءَ ۾ جنم ورتو. هن نصابي علم حاصل نه ڪيو. تنهنڪري پيٽ گذر لاءِ گھڙين جي مستري هجڻ سان گڏ ٽائون ڪاميٽي مٺيءَ ۾ ملازم به آهي. ننڍپڻ کان ئي پنهنجي پيءُ سروپ ڀڳت ۽ چاچي موهن ڀڳت سان گڏ ڳائيندو هو. کيس موهن ڀڳت ۽ سروپ ڀڳت سان گڏ ريڊيو ۽ ٽي وي جا ڪيترا پروگرام مليا. موهن ڀڳت ۽ سروپ ڀڳت جي ديهانت کان پوءِ پنهنجي ڀاءُ، موهن ڀڳت جي پڳدار پٽ شنڪر ڀڳت سان گڏجي ڳائي ٿو. سندس آواز ۾ درد ۽ سوز آهي. پنهنجي وڏن کان ورثي ۾ مليل ڀٽائيءَ جون وايون، ڪبير جون واڻيون، ميران ۽ تلسي داس جا ڀڄن ۽ دوها ڳائيندو آهي.